عِلموں بس کریں او یار – بلھے شاہ | Ilmoun Bas Kari O-Yaar

islamkidunya
عِلموں بس کریں او یار - بلھے شاہ

Ilmoun Bas Kari O-Yaar (Aik Alif) | Bulleh Shah

عِلموں بس کریں او یار – بلھے شاہ

عِلموں بس کریں او یار
اِکّو الف ترے درکار

عِلم نہ آوے وچ شُمار
اِکّو الف ترے درکار
جاندی عُمر، نہیں اِعتبار

عِلموں بس کریں او یار
پڑھ پڑھ لکھ لکھ لاویں ڈھیر
ڈھیر کتاباں چار چوپھیر
گِردے چانن وچ انھیر
پُچھّو: “راہ؟“ تے خبر نہ سار

پڑھ پڑھ شیخ مشائخ ہویا
بھر بھر پیٹ نیندر بھر سویا
جاندی وار نین بھر رویا
ڈُبّا وچ، ارار نہ پار

پڑھ پڑھ شیخ مشائخ کہاویں
اُلٹے مَسلے گھروں بناویں
بے عِلماں نوں لُٹ لُٹ کھاویں
جھوٹے سچے کریں اقرار

پڑھ پڑھ نفل نماز گزاریں
اُچیاں بانگاں، چانگاں ماریں
مِنبر تے چڑھ، وُعظ پُکاریں
کیتا تینوں علم خوار

پڑھ پڑھ مُلاں ہوئے قاضی
اللہ عِلماں باجھوں راضی
ہووے حرص دنوں دِن تازی
تینوں کیتا حرص خوار

پڑھ پڑھ مسئلے روز سناویں
کھانا شک شُبہے دا کھاویں
دَسّیں ہور تے ہور کماویں
اندر کھوٹ باہر سُچیار

پڑھ پڑھ علم نجوم وچارے
گِن دا راساں برج ستارے
پڑھے عزیمتاں منتر جھاڑے
ابجد گِنے تعویذ شمار

عِلموں پئے قضیے ہور
اکھّاں والے انّھے کور
پھڑدے سادھ، تے چھڈن چور
دو ہِیں جہانِیں، ہوون خوار

علموں پئے ہزاراں پھَستے
راہی اٹک رہے وچ رستے
ماریا ہجر ہوئے دل خستے
پیا وچھوڑے دا سر بھار

علموں میاں جی کہاویں
تمبا چک چک منڈی جاویں
دھیلا لے کے چھری چلاویں
نال قصائیاں بوہتا پیار

بوہتا علم عزازیل نے پڑھیا
جھُگّا جھاہا اوس دا سڑیا
گل وچ طوق لعنت دا پڑیا
آخر گیا اوہ بازی ہار

جد میں سبق عشق دا پڑھیا
دریا دیکھ وحدت دا وڑیا
گھمّن گھیریاں دے وچ اڑیا
شاہ عنایت لایا پار!

بلھاؔ رافضی نہ ہے سنّی
عالم فاضل نہ عامل جُنّی
اِکو پڑھایا علم لدنّی
واحد الف میم درکار
عِلموں بس کریں او یار

Ilmoun bas kari oo yaar
Eko Alif terey darkar

Ilm n awey wich shumar
Jandi umer, Nahi aytebar
Eko Alif terey darkar
Ilmoun bas kari oo ya

Parh parh, likh likh ladain dher
Dher kitabaan, cho pheyr
Kerdey chanan, Wich unheyr
Pecho: “Rah?” tey khabar n satar

Parh perh shekh mashaikh khawein
Ultey masley gharoon bata dein
Bey ilmaan noon lut lut khawein
Jhotey Sachey karain aqrqr

Parh parh nafal namaz guzarien
Achian bangaan changha mari
Manber tey chaRRh waaz pukarein
Keeta teeno ilm khawar

Jed main sabaq Ishq da parhaya
Derya dekh Wahedat da warria
Ghuman gheraan dey wich uRRia
Shah Inayat laya paar

Follow Us:

     

Comments

Leave a Reply

Next Post

بابا بلھے شاہ - پڑھی نماز تے نیاز نہ سِکھیا

Pari namaz te nyaz na sikheya پڑھی نماز تے نیاز نہ سِکھیا بابا بلھے شاہ – پڑھی نماز تے نیاز نہ سِکھیا پڑھی نماز تے نیاز نہ سِکھیا تیریاں کِس کَم پڑھیاں نمازاں علم پڑھیا تے عمل نہ کیتا تیریاں کِس کَم کیتیاں واگاں نہ کَہر ڈِٹَھا نہ کَہر والا […]
پڑھی نماز تے نیاز نہ سِکھیا
%d bloggers like this: