تذکرہ سُنئیے اب اُن کا دِلِ بیدار کے ساتھ – اُرْدُو نعت لیرکس
Tazkara Suniye Ab Unka Dil e Bedaar Ke Sath
اَللّٰھُمَّ صَلِّ عَلٰی مُحَمَّدٍ وَّعَلٰٓی اٰلِ مُحَمَّدٍ کَمَا صَلَّیْتَ عَلٰٓی اِبْرَاھِیْمَ وَعَلٰٓی اٰلِ اِبْرَاھِیْمَ اِنَّکَ حَمِیْدٌ مَّجِیْدٌ
اَللّٰھُمَّ بَارِکْ عَلٰی مُحَمَّدٍ وَّعَلٰٓی اٰلِ مُحَمَّدٍ کَمَا بَارَکْتَ عَلٰٓی اِبْرَاھِیْمَ وَعَلٰٓی اٰلِ اِبْرَاھِیْمَ اِنَّکَ حَمِیْدٌ مَّجِیْدٌ
تذکرہ سُنئیے اب اُن کا دِلِ بیدار کے ساتھ
جِن کا ذِکر آتا ہے اکثر شاہِ ابرارﷺ کے ساتھ
صِرف زینبؑ کا وہ خُطبہ سرِ دربار نہ تھا
رُعب حیدرؑ کا بھی تھا جُراٗتِ اِظہار کے ساتھ
بیڑیاں، صدمہ، سفر، پیاس، نقاہت، صحرا
ظلم کیا کیا نہ ہُوئے عابؑدِ بیمارکے ساتھ
ہائے وہ کِسطرح بازارسے گزرے ہونگے
نام تک جِن کا نہ آیا کبھی بازار کے ساتھ
ایک کمسِن کی وہ ننّھی سی لحد کیا دیکھی
رو دئیے ہم تو لپٹ کر درودیوار کے ساتھ
دے گئے درس یہ اُمّت کوحُسینی تیوَر
سَر کو کٹواؤ، مگر نشّۂ پِندار کے ساتھ
یہ بجا تُوہی ہدف تھا سرِ مقتل، لیکن
دُشمنی اصل میں تھی احمدِ مُختارﷺ کے ساتھ
مر کے خود پائی بقا اور اُسے مار دیا
تُو نے کیا چال چلی دُشمنِ عیّار کے ساتھ
اِک سکِینہؑ کیلئے کُرب کی سُولی پہ چڑھا
دیکھئے دار کو عباسِ علَمدارؑ کے ساتھ
میرے سجّاد! یہ دُکھ کیسے بھُلا دُوں تیرا
سختیاں جھیلیں سفر کی، تنِ بیمار کے ساتھ
کرلیا مصلحتوں نے اسے پابندِ ہَوَس
وقت کیا خاک چلے گا تیری رفتار کے ساتھ
آلِ زہراؑ کا سُنا ہے کہ ثناخواں ہے نصیرؔ
آئیے مِلتے ہیں اِس شاعرِ دربار کے ساتھ
لو مدینے کی تجلی سے لگائے ہوئے ہیں
(لَم یَاتِ نَظیرُکَ فِی نَظَر مثل تو نہ شد پیدا جانا (مع ترجمہ
